When They See Us

When They See Us ★★★★½

من فترة كنت بتناقش مع صديق ليا إن المسلسلات المبنية علي أحداث مأساوية حقيقية بتاخد تعاطف و تقييمات أكثر من الناس علشان كدة بتكون في مقدمة التقييمات علي معظم المواقع مهما كانت جودتها.
لكن المسلسل القصير دة فاق كل توقعاتي حرفيًا، في كل الجوانب الفنية و السينمائية و القصصية.
أولًا القصة بتتكلم عن خمس أطفال إتهموا زور بإغتصاب و محاور قتل فتاة في سنترال بارك، نيويورك، قصة حقيقة تقدر تبحث عنها و إتعمل عنها كثير من الأفلام منها The Central Park Five (2012)

في البداية السينماتوجرافي فيه مميز جدًا، Bradford Young السينماتوجرافر المعروف بشغله في Arrival قدم حاجة جميلة فشخ هنا، من البداية لاحظت إنه مستخدمش غير بلاطات ألوان غامقة في معظم المشاهد المأساوية و مستخدمش الفاتحة غير في النهاية لما "نهايتهم السعيدة" بدأت، في معظم المشاهد إستخدم تريك بصري بإنه يخليها Wide screen و يخلي الشخصيات في واحدة من زوايا الشاشة مع فراغ في الباقي اللي هنا بيوضح مفهوم الـ Alienation، و دي كانت فكرة المسلسل في البداية، تغريب الأشخاص بناءًا علي عرقهم و مكان نشأتهم، الفكرة دي شوفتها في أكثر من كذا عمل بس المرة الوحيدة اللي شوفتها إتعملت بطريقة مميزة في مسلسل كانت في Mr. Robot و اللي كانت نفس فكرة المسلسل تغريب إليوت مش بس عن الناس و العالم، بس عن نفسه، في الإنترو بتاع الحلقة الثانية و الأوترو بتاع الحلقة الأخيرة فيه Fluid camera مناسب مع المواقف اللي بيتحط فيها الشخصيات و في النهاية السينماتوجرافي كان مميز جدًا و من أسباب حبي للمسلسل أصلًا، الكادرات جميلة فشخ.

أما بالنسبة للكتابة فـ كان عمل مشترك بين عدة كتّاب أهمهم Ava DuVernay اللي معظم أفلامها كانت بتدافع عن حقوق البلاك بيبول زي فيلم Selema، و Robin Swcord، السيناريوهات و الحوارات في المسلسل حسيتها طبيعية مش زي معظم الأفلام و المسلسلات من نفس النوع اللي بيكون فيها شئ من المبالغة، و بغض النظر إن القصة مش نفس الأصلية لتأثيرات درامية كالعادة، لكن قدر يخليني أحس بتعاطف مع الشخصيات من أول ١٥ دقيقة فيه، طريقة سرد الأحداث و التنقل بين القضايا، التنقل بين الشخصيات لما كانوا صغيرين و كبار، طريقة معاملة الميديا و الشعب ليهم، الموضوع كله بيفكرني بـ فيلم من أفلامي المفضلة، The Hunt، اللي له نفس الفكرة - ريكومندد فشخ من مفضلاتي -، الجميل في الموضوع إن من المتتجين و المشرفين علي الكتابة كانت أوبرا و كون يكون موجود شخص مجرب معاناة البلاك بيبول علشان ميكونش السيناريو كله شفقة بس، السيناريو فعلًا بيوضح الحياة اللي كانوا بيعيشوها في العقود اللي فاتت و دور السياسات في كدة، بصراحة أنا حبيت فشخ الكتابة، الستوري أركز كانت شبه ناقصة مع الكل ماعدا كوري، الحلقة الأخيرة عمومًا كانت له فقط و كان ستوري أرك جميل فشخ، توضيح العذاب اللي حصله في السجن، كان مقنع بدرجة غريبة.
لكن مش كل حاجة كاملة أكيد، المسلسل كان محتاج حلقتين علي الأقل زيادة علشان يبقي "كامل"، لأنه ركز أكثر حاجة علي ستوري لاين شخصيتين ضمن الخمسة، حتي مجابش معاناتهم كأطفال قصّر في السجن لمدة من ٦ لـ ١٥ سنة، الوحيد اللي ظهر كان كوري وايز، و بصراحة كان أحسن ستوري أرك في المسلسل كله، طفل قاصر يدخل سجن راشدين و هو أصلًا مكانش موجود في الليلة اللي حصل فيها دة.
الإخراج كان من نفس الكاتبة Ava DuVernay، مكانش فيه غلطة و مفيش تعليق عليه نهائي لأن كان إخراج مثالي مناسب للموضوع الحرج اللي المسلسل بيتكلم عنه، و التمثيل كان أحسن من رائع بالنسبة للأطفال و الكاست المساعد، لكن الشخص اللي أدائه علق معايا فعلًا كان Jharrel Jerome / كوري وايز، مشهور بـ فيلم Moonlight، أنا مش قادر أقول إن حرفيًا لو المسلسل هيترشح للإيمي فـ لازم يأخد أحسن ممثل مساعد، تمثيله، و ريأكشناته وشه كـ طفل و كـ شخص بالغ في السجن كانت جميلة فشخ.
و المسلسل إستخدم ساوندتراك مناسبة للمواقف من الـBlack Culture و غيره و كانت حلوة فشخ، هبقي أحط لينكات للتراكات اللي عجبتني.
كلام جانبي، المسلسل فعلًا يستحق وقتك و بصراحة المسلسل أثر فيا فشخ لأنه بيظهر الجانب اللي مش وردي في العالم و السياسات القذرة اللي بتتلعب و بيروح وراها ألاف الأشخاص كل يوم و حياتهم بتدمر، مجرد تخيل إن ٥ أشخاص طفولتهم و مراهقتهم ضاعت علشان بس شوية عنصرية دة شئ مرعب في حد ذاته، أنا حابب أشكر القائمين علي المسلسل واحد واحد فعلًا.
تقييمي النهائي للمسلسل، ٩.٥/١٠، زي ما وضحت الشئ اللي مدايقني في المسلسل فيه، لكن غير كدة Flawless، ريكومندد جدًا.

Fayez liked this review