Tenet ★★★★

معلش بقي الفيلم ده عظيم

الفيلم اه عظيم كتنفيذ و كإخراج انت جايبلي ممثلين بيقوموا بمشاهد أكشن معكوسة
 وبعدين انت لو خدت المشاهد دي واتفرجت عليها ببطئ فانت هتلاقي الحركات مش عشوائية اصلا فا صباح جايزة الاوسكار يعني  
كمان الممثلين كلهم بلا استثناء ادائهم حلو، أعظمهم كان أستاذ kenneth branagh...جسد الشخصية بإتقان انا كل مشاعره كانت بتوصلي، يعني في مشهد اليخت انا كنت متعاطفة معاه هو بسبب كمية المشاعر اللي في عينيه مع ان مراته المفروض هي اللي اتعاطف معاها كأم وزوجة مهانة بس والله طول الفيلم انا مركزة في طولها وان الكل اقصر منها والموضوع مستفز بصريا وده حسيته اوي في مشهد المطبخ في اول الفيلم
بعدين كينيث مش عارفة ليه انا شايفاه نولان، بجد طول الفيلم مقتنعة ان هو نولان 😂

بعيدا عن الأكشن بقي والممثلين انت كمان عندك فكرة عظيمة محدش عملها قبل كدة
هو فيلم tenet اصلا عبارة عن ايه؟؟ 
من غير تعقيدات يعني الفكرة الرئيسية هي السفر عبر الزمن 
بس نولان بدل ما يعمل زي باقي الافلام يجيبلك الة زمن وهوب دبل كليك بقيت في الماضي خلاص 
قالك لا خلينا نتكلم كلام علمي ونفكنا من الخيال، هو في خط زمني واحد الخط ده دايما وجهته هي المستقبل تمام؟ تمام، فا انت عشان تسافر للماضي انت بتعمل حاجة، انت بتمشي عكس تيار الزمن فا طبيعي وانت مسافر في رحلتك الي الماضي كل حاجة حواليك هتبقي معكوسة كل حاجة بمعني كل حاجة حتي الهوا 
فا اللي هو " وانت راجع كنا احنا لسة رايحيين" 

هو شارحلك كل حاجة في اول الفيلم  وطول الفيلم عمال بيشرحلك والموضوع بسيط مش معقد بس اللي بيعقد الدنيا ان اللي بيبقي راجع للماضي بيتصادم مع من ذاهب الي المستقبل وان كل ده بيتقال في صورة اكشن واما بيهدي عشان تستوعب اللي بيحصل يا بيرميلك معلومات تقيلة يا بيحكي قصة فاضية عن زوج متعصب وزوجة فاض بيها الامر وعاوزة تهرب منه فا انا بدل ما استوعب فكرة الفيلم، مخي بينشغل بانه ينتقد القصة وكمان بينشغل بالمعلومات اللي رماها في وشي
بعدين انا اول مرة شفت الفيلم حسيت ان في plot holes كتيرة زي موضوع اندرية اما كات قتلته عاليخت، كان في تساؤلات كتيرة بس بعد تالت مرة اكتشفت ان نولان شارح كل صغيرة وكبيرة في الفيلم ومفيش ثغرات 
وزي مسلسل دارك هو بيتكلم برده عن ال infinity loop 

فا انت عندك اول مرة فيلم بيتكلم عن الزمن والسفر للماضي بطريقة علمية تخليك تفكر في ان احتمالية السفر للماضي ممكنة 
وعندك مشاهد اكشن عظيمة 
وعندك موسيقي اعظم, بالمناسبة الي عملها اسمه ludwig goransson وشغله حلو اوي بنصحكم تسمعوله
والرسالة اللي نولان بيحاول يوصلها قوية ممكن لو مهتم تقرأ الريفيو ده هتفهم اكتر...(https://boxd.it/1kthov)
ومش بعيد نولان يكسب اوسكار احسن مخرج السنادي
اول مرة شفت الفيلم اديتله ٣ نجوم بس دلوقتي اقدر اديله ٤ نجوم بكل اريحية وممكن تزيد في الريوتش كمان.

hendnabel liked these reviews